Z Njebjelčic/Nebelschütz. Sobotu tyźeń jo tudy we wjažy gmejnskego zastojnstwa ceły źeń wobradował Serbski sejm. Za powěsću Hanza Wylema-Kella su wóni wobzamknuli pismo na wuglowu komisiju (wóna dej wuźěłaś strategiju za wótstupjenje Nimskeje wót wugla a raźiś kněžaŕstwoju, kak mógali jo we wuglowych stronach kompensěrowaś). We njom póžedaju, až ta škóda a wobśěžkanje, kótaruž serbski lud jo měł pśez brunicowe górnistwo, dej se zarownaś. Kak? Pśez to, až serbskemu ludoju (rozmjej: sejmoju) worduju wušnosćowe kompetence na pólu serbskeje kultury a šulstwa pśepowdane. A teke pjenjeze, ak su za zastojanje teje awtonomije trjebne. Wušej togo dej Serbski sejm měś to pšawo na sobupowědanje pśi pśeměnjenju góspodaŕskich strukturow w Łužycy.