Z Janšojc/Jänschwalde. W janšojskem domowniskem muzeumje jo tuchylu „Wustajeńca za wódychanje, źiwanje a smjejkotanje“. Wustajone su mólowanja, grafiki, plakaty, portrje, karikatury a ilustracije. Wóni póchadaju wót pórika wuměłcow Brigitte Duhric a Meinharda Bärmicha. Hochoskej wuměłca stej měłej pśi wótwórjenju wjele gósćow. Jeju zgromadny syn Johann jo muzicěrował na klawěrje a gitarje.

Wustajeńca buźo pśistupna až do zachopjeńka měrca. Tuchylu pak muzej jo wótwórjony jano na zarědowanjach abo gaž jo cas wucynjone. Muzejownica Nadine Adamowa pšosy wó to, až luźe deje powědaś na telefonowy napowědak abo až deje pisaś mejlku, gaž kśě do muzeja. Wóna buźo to jim pón zmóžniś.

Jadno zarědowanje pak lětosa hyšći jo: stwórtk, 13. decembra, maju muzej wótcynjony wót zeger 13:00 do 18:00. Mjazy zeger 15:00 a 17:00 buźo tam adwentske wótpołdnjo z punšom a tejom. Tema budu janšojske adwentske a jatšowne nałogi. Janšojski bog stoj we witrinje a luźe mógu jen wobźiwowaś a se wó njom wšake wulicowaś.