W měsće Chóśebuz se napšawdu wjele cyni, tšoj a gibjo w serbskem žywjenju. Młoge z togo jo znate a se wó tom pišo a powěda, wšake pak se stanjo za „kulisami“. A to njepłaśi jano za Domowinu a za wše te serbske institucije a towaristwa, ale teke za měsćańske zastojnstwo, w „Měsćańskej radnicy“ a druge amty a zastojnstwa.

Wó wšom tom jo było kóńc nowembra to grono w Měsćańskem domje, ako su se tam zmakali cłonki měsćańskeje zgromaźiny, měsćańskego parlamenta, k swójomu nowemberskemu južo 44. pósejźenju. Ana Kosacojc-Kozelowa, zagronita (Beauftragte) za serbske nastupnosći w měsće, jo tam pódała rozpšawu wó swójom źěle w lěśe 2018 a docełego wó aktualnem serbskem žywjenju w Chóśebuzu.