Z Barlinja/Berlin. Wót zachadneje njeźele jězdźi nowy direktny nocny śěg z Barlinja pśez Wrocław, Opole a Ostravu do Wiena. Wón wótjěźo z głownego dwórnišća zeger 18.30, a dostanjo swój cel zeger 6.35 zajtša.

Ale bóžko, ten śěg njejěźo pśez Chóśebuz, ale pśez Frankford, Rzepin a Zelenu Góru. Rownož zeleznicowa droga z Barlinja do Wrocława pśez Dolnu Łužycu (Chóśebuz, Baršć a Žarow) jo nejkrotša, ga weto jo zastojaŕka nowego śěga, Awstriska zwězkowa zeleznica, wuzwóliła sebje tu dlejšu wariantu. Pśeto ta sama jo elektrificěrowana a se góźi za spěšne jězdźenje ‒ su wóni znate cynili. Dla togo warnujo to drogowanje do Wrocława pó njej jano 4 štundy a pěśnasćo minutow. K pśirownanju: Direktny śěg z Barlinja do Wrocława pśez Chóśebuz a Baršć (doněnta kulturny śěg, ako jězdźi jano na sobotach dopołdnja) jěźo běrtyl štundy dlej, rownož ma jadnab 30 km krotšu drogu.