Wědomnostniki Serbskego instituta a Bramborskeje techniskeje uniwersity Chóśebuz/Zły Komorow, zastupniki Domowiny, Załožby za serbski lud, Bramborskeje serbskeje rady a bramborskego ministarstwa za wědomnosć a kulturu su woglědali zachadny tyźeń dwa dnja do Połdnjowego Tirola (Südtirol) w Italskej. Su se tam bližej zeznali ze situaciju w rolnikarstwje a turizmje kaž teke z tym, kak se tam nimska a ladinska rěc (wónej stej tam mjeńšynowej rěcy) do togo zapśěgnjotej. Pśi tom su kśěli wuknuś, kak by mógali rolnikarstwo a turizm zapśěgnuś do serbskich strategijow a planow do pśedwiźonych strukturnych změnow we Łužycy. Wót profesora Pana, kenž źěła w połdnjowotirolskem instituśe ludowych kupkow w Bozenje a wót profesora Videsotta wót Pedagogiskeje fakulty Bozenskeje uniwersity, su zgónili, kak tam wšo to politiske a socialne spěchuju a pódpěraju, což k tomu pśinosujo, aby wše te burske žywnosći daloko a wótlažane w górach zdźaržali. K tomu su teke dojěli na burski dwór wusoko nad městom Bozen, źož woplěwaju ekologiske rolnikarstwo.