Z Chóśebuza/Cottbus. Partnarska wuměna wuknikow Dolnoserbskego gymnaziuma a českego gymnaziuma w měsće Hořice ma tradiciju wót lěta 2006. W oktoberje 2018 jo pśijěła kupka 15 českich wuknikow zasej do Chóśebuza.
Z nimi stej sobu jěłej ceptarja Jan Tomiček a Tomaš Horak. Program, kótaryž su pśigótowali ceptarje DSG Lorena Neumannowa, Dietlind Lűdtkowa, Emilia Nimcowa a druge ze swójimi wuknikami jo był wjelgin rědny. Česke wukniki su bydlili we łužyskich familijach, źož jo se jim wjelgin spódobało. Česki wuknik (kótaryž ma českego nana a nimsku maś) Tom Lanta jo wó tom pisał:
„We tyźenju wót 14. do 19. oktobera 2018 smy woglědali k našym pśijaśelam w Chóśebuzu. My smy se wjaselili na stare tradicije a nałogi Łužyskich Serbow w Dolnej Łužycy, kótarež su až do źinsajšnego dnja žywe. My smy bydlili we łužyskich familijach, kótarež su byli wjelgin lube. Na pśikład ta mója familija: Wóni njejsu byli jano lube, ale teke wjelgin wjasołe a napněte na mnjo, a to rozgrono z nimi jo było wjelgin lube a pśijazne.