We ramiku filmowego festiwala jo se zachopjeńk nowembera zmakała wjelika mań filmarjow z cełego swěta w Chóśebuzu. Wóni su se wuměnili wó swójich filmach a su teke na kontaktowej berzy za filmarjow pjenjeze za nowe projekty nawabili. Góźbu festiwala su pak teke žedne Łužycanarje wužyli za swójo 7. zmakanje ako seś łužyskich filmarjow.

Chto jo tam pódla? Seś ma serbske a nimske cłonki. Su to lajske a profesionelne režisery z Łužyce, ako na pśikład Erik Schiesko, Angela Schuster a Donald Saischowa. Rowno tak organizatory filmowych festiwalow ako Ola Staszel wót filmowego festiwala Nysa abo dr. Grit Lemke, kótara jo na chóśebuskem filmowem festiwalu kuratorka za filmowu sekciju Domownja. Abo dramaturgowka Cosima Stracke-Nawka z Budyšyna, ako se połowański z financěrowanim filmow zaběra.