Zastupny pśedsedaŕ wjerbańkego agrarnego drustwa Alfred Ramot a źěłaśeŕ Hagen Junker ze śeletami we krowjecej groźi. Nagromadu maju na wjelich městach 1.600 štuk zbóža, mjazy nimi 250 śeletow. Tuchylu futruju jim tudy wjele wěcej sena ako we normalnych lětach, dokulž majsa su lětosa małko nažněli. Futera maju hyšći dosć, a to lažy na tom, až maju we cełem 2.300 ha gruntow, a to jo we pśirownanju z teju licbu zbóža wjele. Dla sušy su lětosa pśi senowych žnjach kradu na to glědali, aby „kužde spjełko“ z łukow wuzběrali, a maju stakim dosć sena nawózonego. Teke forot wót łońskego lěta njejo hyšći pśetrjebany. Akle gaby pśiduce lěto było tak suche ako lětosa, ga pótom by do nuze pśišli – měni Alfred Ramot. 
Lěśe lětosa jo było nejśoplejše w Nimskej wót lěta 1881, ako su zachopili wjedro zapisowaś a temperaturu měriś. To jo k wěsći dała Nimska wjedrowa słužba. Lětosa wót apryla do junija jo temperatura se wót pśerězneje lěśojskeje temperatury wótchyliła wó +3,6°C (ako referenca płaśe pśerězne temperatury we casu 1961‒1990). K tomu linjecemu wjedru jo pśipśišła ekstremna suš. We casu wót apryla do junija njejo hyšći žednje tak małko dešća padnuło ako lětosa, a deficit dešća jo wunjasł za cełu Nimsku -110 mm (wót dešćowego deficita se powěda, gaž wěcej wódy wupšažyjo (verdunsten) nježli dešća padnjo). A teke něnto, rownož słyńco wěcej njesmali a njebjo jo cesto póśěgnjone, ga weto z tych mrokawow pada se jano wjelgin małko.
Wuknice seminarnego kursa na Dolnoserbskem gymnaziumje su sebje stajili to pšašanje, kak to wjedro jo se wucyniło na rolnikaŕstwo a na žni w našych stronach. Wóni su se wopšašowali rolnikarjow a kubłarjow zbóža a sadu we wšakich jsach, aby wót nich zgónili, kak jo se jim lětosa zejšło.
Wjerbno: Wósebnje majs jo škódował
