Wjerbno jo dostało toflicku z napismom „Nimsko-serbska gmejna“. Wótlěwa: wjerbański šolta Joachim Dieke, pśedsedarka serbskego wuběrka bórkojskego amta Anett Zyšcyna a Měto Nowak wót bramborskego kněžarstwa. Dieke: ned pśiducy tyźeń bźomy ju powjesnuś,, až kuždy to wiźi. 
Z Bórkow/Burg. W bórkojskem amśe maju wót slědnego lěta stawne Serbske blido. Serbske luźe se tam zmakaju, aby se mjazsobu lěpjej spóznali, se rozgranjali a zgromadnje to serbske w amśe doprědka spórali. Tśi raze su se južo zmakali.
16. oktobra su sebje do Wjerbna pśepšosyli Hanza Wylema-Kella ako powědarja iniciatiwy za Serbski sejm. Nadawk mějuca za serbske nastupnosći w bórkojskem amśe Anett Sischke (Zyšcyna)z Rubyna jo jomu na zachopjeńku stajiła cełu litanaju pšašanjow, na kótarež jo dejał we swójom pśednosku wótegroniś. A jo kritiski pśispomjeła: „Smy taki mały lud. Mam tšach, až ta ceła wěc ze sejmom buźo nas wěcej rozšćěpiś ako zwězaś“.