Lube źiśi,

wence buźo pomałem zyma. Łopjenka padaju. Wětšyki a huški duju. Ja se śopło woblacom. Tak jo rědnje spódobnje. Stakim trjebam micu. Maśo Wy rědnu śopłu micu? Ja mam. Ma teke Waša pupka micu? Gaž njama, ga budu Wam pokazaś, kak móžośo jej jadnu wubasliś. Zawěsće móžośo micu teke za sebje wugótowaś. Glědajśo! Mica njeznjaso wódu.

Za micu trjebaśo krepowu papjeru, šyroki wuwězk, lipaty bant a nožyce (foto 1). Krepowu papjeru móžośo we wšyknych barwach kupiś. Ja som wzeła lylowu papjeru. Teke lipaty bant dajo we wšakich barwach. Transparentny lipaty bant móžośo teke wužywaś. Kuždy wzejo to, ako jomu za gubu jo. Ja budu Wam tak wukazowaś, ako jadnej paršonje abo dwěma paršonoma abo wěcej paršonam. Tak móžośo wšykne formy imperatiwa wuknuś.

Tak maš, matej abo maśo cyniś. Wzejśo se wuwězk. Wuměŕ, wuměŕtej abo wuměŕśo, kaka tłusta głowa pupki jo (foto 2). Źarž, źaržtej abo źaržćo z palcom to město, źož wuwězk zmakajo se ze zachopjeńkom banta. Wzej, wzejtej abo wzejśo wuwězk wót głowki pupki. Wótstśigaj, wótstśigajtej abo wótstśigagajśo wuwězk tak, až pasujo raz wokoło głowy pupki (foto 3).