Wót wšogo zachopjeńka naju zmakanja wujźo wjasołosć a fryšnosć wót njeje. 37lětna muzikowa wědomnostnica dr. Theresa Jacobsowa jo wót 2015 na poł źěłowego městna w Serbskem instituśe w Budyšynje pśistajona. Swóje nadawki mě krotko nacerijo: „Ako wědomnostna sobuźěłaśerka slěźim na pólu imaterielnego kulturnego derbstwa Serbow we wobłuku medijow, drastwow, rejow, spiwow a dalšnych kulturnych srědkow. Źo wó to, kak se góźi toś to derbstwo a z tym serbska identita dalej wuwijaś a w ludu zasej šyroko wóžywiś.“ Młoda žeńska bydli z familiju w Lipsku a wóttam wěcej raz wob mjasec jězdźi do Budyšyna na źěło. „Mě toś to źěło wjelike wjasele gótujo. Dla togo až jo to wjelgin šyroke pólo, móžoš se dłymoko do tradicijow, stawiznow, žywjeńskich wašnjow a zacuśow serbskego luda zanuriś a z togo kreatiwne projekty wuźěłaś a je zwopšawdniś w praksy.“