W lětach 2019 do 2023 buźo Marcus Końcaŕ, zastupny jadnaŕ Domowiny a cłonk bramborskeje Serbskeje rady, zajmy Serbow a Domowiny zastupowaś w rozgłosowej raźe rbb. To běšo naraźiło župne pśedsedarstwo na swójom pósejźenju w septembrje, a Zwězkowe pśedsedarstwo Domowiny jo slědny pětk jogo ze wšymi głosami wuzwóliło a z tym delegěrowało ako zastupnika zjadnośeństwow Serbow do togo nejwušego gremiuma radija Barlin-Bramborska (rbb). Do njogo słuša dogromady 30 cłonkow, kenž zastupuju mjazy drugim bramborski a barliński parlament, wšake cerkwje, akademiju wuměłstwa, źěłarnistwo (Gewerkschaft), žeńskich, młoźinu a druge towaristwa a zjadnośeństwa.

Markus Końcaŕ co wósebnje pódpěrowaś bramborske serbske radijo a jogo redakciju w sćelaku Chóśebuz – to jo wón gronił.

W slědnych 8 lětach jo měła toś tu wažnu funkciju Babett Zenkerowa, wjednica Dešańskego muzeja. Pśedsedaŕ Domowiny David Statnik jo se pla njeje za dobre źěło w rozgłosowej raźe wutšobnje wuźěkował.