Domowina se na wšaki part procujo, pódpěraś serbske šulstwo. To groni wósebnje serbsku wucbu a serbskich pedagogow. Wjeliku rolu grajo pśi tom Serbske šulske towaristwo ako źěl Domowiny, a to głownje w sakskej Górnej Łužycy. Teke Rěcny centrum Witaj, ako słuša k Domowinje, bejnje k tomu pśinosujo, aby źiśi a młodostne se w šulach a te nejmjeńše w źiśecych zagrodkach pśiswójili serbsku rěc. A teke Serbska rada – ta w Bramborskej rowno tak ako w Sakskej – wužywa wětšy źěl swójogo źěła, aby to serbske šulstwo pódpěrali a zmócnili. Na wšaki part źěła Domowina gromaźe ze serbskimi ceptarkami a ceptarjami a źiśownicami, a we jeje wjednistwje jo jaden referent wósebnje zagronity za kubłanje (Bildung) a šulstwo. Groniś pak musy se k tomu teke to, až jo za Domowinu śěžko, pśecej wugbaś direktny wliw na šule a z tym na serbsku wucbu. To mógu ministarstwo, šulske amty a komuny a wšake towaristwa, w kótarychž rukach su šule a źiśece zagrodki.