Lube źiśi,
źinsa cytajśo něco z Hochoze: Dłujko smy se w hochoskej źiśowni ‚Tyca‘ pśigótowali na lětosne kokot a smy wó tom powědali. Starjejše su pomagali wěnki wiś a wrota stajaś. Katrin Tilgnerowa jo naše serbske drastwy pśigótowała a źiśi su pilnje wuknuli rejowaś.
Sobotu, 25. awgusta, smy woblekali źewjeś źowćkow na Ungerojc dwórje. Pózdźej su pśišli pěśo małe rejtowarje z kołowymi kónikami, pón jo dalej šło na swěźeńske městno. Teke Katrin Tilgnerowa a wótkubłarka Manuela Weichert-Glaserowa stej pśišłej burskej, Antje Lejnickowa (Lehnitzke) jo jima pomagała se woblekaś. Jej wutšobny źěk.
Smy zgromadnje domaršěrowali z młoźinu a kapału. Nejžpjerwjej jo M. Weichert-Glaserowa wuwitała wšykne a K. Tilgnerowa jo powjesnuła słodkosći na wrota. Pótom su łapali kokota. Pśiglědarje su mócnje klaskali. Picańske měsćańske gerce su grali. Małe źowća ze źiśownje su směli soburejowaś.