Lěto 1933 jo było wjelgin tužne lěto za dolnoserbske casnikarstwo – w měrcu togo lěta jo Casnik zajšeł, z naźeju, až buźo zasej stanuś, ako jo to redaktor Fryco Rocha we swójom slědnem wudaśu w měrcu 1933 pisał. Nježli jo se pak toś ta naźeja dopołniła, jo pśejšło wušej 14 lět! Chtož jo kśěł w toś tom dłujkem a śěžkem casu serbski cytaś, ten jo dejał pśeběraś stare numery Casnika a dalšne starše knigły a, to se wě, głownje dolnoserbsku bibliju a dolnoserbske spiwarske.