Z Depska/Döbbrick. Kóńc junija jo tudy wumrěła Markaric Anna (Zachow, roź. Müllerojc, na serbske Markaric), 92 lět stara. Wóna jo ta slědna roźona Pólakaŕka, kótaraž jo wót domu wjelgin derje serbske powědała. K dopomnjeśu: Tym wěcej ako 30 dwóram, kótarež laže rozdrosćone mjazy Depskom, Žylowom a Dešnom, groni se na serbske Pólska a tym wobydlarjam Pólaki abo Pólakarje. Ceła Pólska jo słušała až do 1930tych lět do Žylowa, pśez to pak, až jadnab 15 dwórow jo lažało wjelgin blisko depšćańskeje mroki, su je we lěśe 1938 do Depska pśibili. Wina na tom jo było, až starjejše su kśěli swóje źiśi lubjej do depšćańskeje šule słaś – pśeto źiśi su tu krotku drogu pśeběgnuli za 10 minutow, do Žylowa pak su dejali wěcej ak poł štundy pśez gólu gnaś. Pśez to, až Depsk jo był druga gmejna, ga su wóni pjerwjej dejali šulske pjenjeze płaśiś.

Pólskej gronje źinsa oficielnje na nimske Sielow-Ausbau abo Erlengrund (mě z hitlarskego casa). Tomu do Depska pśibitemu źěloju groni se źinsa we amtskej rěcy Döbbrick-Süd.