Z Barbuka/Bärenbrück. Tudska Domowinska kupka njebuźo to wuzwólowanje Serbskego sejma pódpěraś. Wóni njebudu žednogo kandidata za njo wustajiś. To su wóni sebje gronili stwórtk pśed dwěma tyźenjoma na zmakanju, kótarež jo zwołał pśedsedaŕ Torsten Symula na pógónjenje cłonka Manfreda Hobliža ze jsy. Tensamy jo wó njo pšosył za tym, ako jo w Casniku namakał informaciske łopjenko Serbskego sejma a se wobźělił w juniju na wuzwólowarskem forumje iniciatiwy w Dešnje. Wón jo se wjelgin źiwował, až „prědne serbske ludowe zastupnistwo wordujo wu­zwólowane, do zala w Dešnje pak pśisamem nicht njejo njejo pśišeł“. „Ja som był šokěrowany!“, jo wón na zmakanju w Barbuce gronił. Serbski lud wordujo napominany k wumjenjenju kandidatow do Serbskego sejma, pśi tom pak nicht we Domowinskej kupce a we jsy nic wót togo njewě. Jogo mysl jo: Domowina cyni mało, aby lud informěrowali a argumenty pśednjasli, a aby luźe mógali sebje měnjenje stwóriś. Wón jo wubójany, až „luźe wobźěliju se na wuzwólowanju jano dla njewěźenja“.