Z města Leeuwarden w Nižozemskej (na friziske Ljouwert). Zgromaźina delegatow FUEN (Federalistiskeje unije europskich narodnych mjeńšynow) jo sobotu tyźeń wobzamknuła dwě nachwatnej rezoluciji. K prědnemu: Delegaty su zatamali grono nowego italskego ministarja za nutśikowne nastupnosći Matteja Salvinija. Wón jo za jich suźenim zjawnje štyrił pśeśiwo luźam Sinti a Roma a co pśelicyś, wjele jich w Italskej jo, rownož take licenje njemaka se z wustawu (Verfassung). Pšosbu wó rezoluciju jo stajiła Nimska centralna rada Sinti a Roma.

K drugemu: FUEN nagranja kněžarstwo Kroatiskeje, až dej zadoraś pśikrotcenju mjeńšynowych pšawow pśez populistiske gibanje „Lud ma to grono“. Toś ta iniciatiwa zběra pódpisma a co pśewjasć referendum pśeśiwo wuzwólowanju wótpósłanych narodnych mjeńšynow do parlamenta. Wobej rezoluciji stej se jadnogłosnje wobzamknułej.