Z Chóśebuza/Cottbus. Wukniki źewjetego lětnika na Dolnoserbskem gymnaziumje su zachadny stwórtk měli we awli „serbske kubłańske wiki“. Wóni su se na nich wopóznali ze serbskimi institucijami a pśišli z jich zastupnikami do rozgrona. Zastupjone su byli serbske medije (serbska redakcija rbb, Nowy Casnik), Šula za dolnoserbsku rěc a kulturu, Serbski institut, Domowina, Załožba za serbski lud, Institut za sorabistiku, Rěcny centrum Witaj a Towaristwo za serbsku rěc w cerkwi.

Nejpjerwjej pak jo Měto Nowak, referent krajneje zagroniteje za nastupnosći Serbow, źaržał wuknikam chytše grono. Wón jo nadrobnje nalicył pówołanja a wobcerjenja, źož znaśe serbskeje rěcy mógu absolwentam DSG wužytk pśinjasć. K nim słušaju, to se wě, źěłowe města we serbskich institucijach, šuli a źiśownjach, ale nic jano. W turizmje, amtach a zastojnstwach, na uniwersitach, na pólu muziki, kultury – wšuźi móžo to serbske abolwentoju pomoc, jadnu wósebnu nišu namakaś. Wušej togo: Znaśa serbskeje rěcy mógu studentam, kótarež su do cuzby wujěli studěrowat, pomoc w Łužycy źěło namakaś.