Wabjenje k wuzwólowanju: cłonk iniciatiwy Hanzo Wylem-Kell źaržy w ruce nowe łopjenko, kótarež kśě šołtam a prědkstojarjam jsow we serbskej Łužycy z listom rozpósłaś. A maju naźeju, až wóni budu je na zjawnych městach powjesyś. Pódla njogo: cłonka Rady starostow Edith Pjeńkowa z Rownego a nejwěcej prominentny starosta prof. Klaws Thielmann z Chasowa w Górnej Łužycy, něgajšny ministaŕ za strowotnistwo DDR. 
Z Rownego/Rohne. Iniciatiwa za Serbski sejm pśewjeźo skóro prědne regionalne forumy, źož budu rozkładowaś ideju serbskego parlamenta a wabiś luźi k wuzwólowanju – ako wuzwólowarje a kandidaty. To jo była głowna tema wobradowanja iniciatiwy a Rady starostow stwórtk we starej šuli w Rownem, źož jo se wobźěliło 11 luźi. Cłonk iniciatiwy Hanzo Wylem-Kell z Huštanja jo pśipowěźeł, až budu prědny forum w Dolnej Łužycy w Dešnje we kjarcmje Serbski dwór organizěrowaś, a to južo srjodu za tyźeń (20. junij, glej termin na 7. boce). Zal jo za jogo powěścu skazany.
Dalšne forumy budu nejpjerwjej we Wórjejcach a Chrósćicach. Górnołužyske starosty su byli wobjadne, až jo lěpjej wěcej zgromaźinow we jsach pśewjasć, ako jadnu wjeliku: Alexander Pólk jo pśipowěźeł, až se mysli na Hórki, Radwor a Rakecy.
