Kjarchob pla jsy Güstritz z 11. do 13. stolěśa: Jaden wót nejwětšych z togo casa, ak su wuryli w Nimskej. Wón jo wósebnje interesantny, dokulaž jo z „pśechodnego casa“: kśesćijaństwo jo tudy akle krotko pjerwjej nastało. 
Z Dešna/Dissen. Su naše wóścy we srjejźowěku (Mittelalter) wěrili, až někotare wumarliki jim pó swójej smjerśi škóźe? Mócne wopokazni takeje pśiwěry jo namakał we 90tych lětach archeologa dr. Arne Lucke na wjelikem pógrěbnišću (kjarchobje) we wendlandskej jsy Güstritz, źož su słowjańske wobydlarje wót 11. do 13. stolěśa swóje wumarliki zakopowali. Lucke jo wót swójogo slěźenja wulicował pśedslědny pětk w dešańskem muzeju, pśi góźbje srjejźowěkowego swěźenja we wjasce Stary Lud .
Knochy tych zakopanych luźi su se we zejmi derje wuchowali. Archeologi su pśi archeologiskich wurywanjach wuznali, až we wjelich rowach su nopy wót rěpja wótźělone. Za wšym zdaśim jo wjele lět pó zakopowanju něcht togo wumarlika wurył, jomu głowu wótrubał a zasej zachytał. To se wěsće wuznajo teke z njeregularnje pśewobrośoneje zemje.
