Z Raduša/Raddusch. Jaden z nejrědnjejšych starych historiskich młynow w Błotach a wokolinje jo ten Błotny młyn (Buschmüh­le). Jen su natwarili 1777, to groni, pśed pśisamem 250 lětami, pśi Grobli, źož něnto wjeźo droga z Raduša k znatemu Dubkowemu młynoju.

Až do lěta 1952 su how trajdu mlali a teke wólej bili. Swóje zernka su howko wózyli bury z Raduša, z Prizarskich Bórkow a naslědku teke z Lipjego, gaž Dubkowy młyn jo pśestał źěłaś. Za wětšy źěl su tu trajdu k mlaśu a gótowu muku transportěrowali z cołnami. Pśi Błotnem młynje su natwarili wjelike pušćadło. Wóno jo se 2007 ceło modernizěrowało a wutwariło, což jo k dobremu cołnarjow a cołnowanja.