Z Chóśebuza/Cottbus. Dr. Dieter Šwjela (Schwela) (77) z Essena, fararja Bogumiła Šwjele syna syn, jo zachadnu srjodu pósćił Serbskemu muzejoju drogotnu mapu z familijowego wobsejźenja. We njej namakajo se jadnab 50 listow w nimskej rěcy z lětow 1953–79, kótarež mólaŕ Fryco Latk (1895–1980, z rodom z Noweje Jsy a bydlecy we Weimaru) jo pisał Dieterowemu nanoju, rěcniku dr. Mjertynoju Šwjeli (Bogumiła Šwjele synoju) – to jo nam dała k wěsći kuratorka muzeja Christina Kliemowa. K mapje słuša teke album z kreslankami a litografijami, póglědnicami a kórtami z glukužycenjami, kótarež Latk jo mólował abo kreslił. Na nich namakaju se interesantne a rědne motiwy kaž młoda namšarka w namšarskej drastwje abo jaden starc. To su za wětšy źěł portreje, karikatury (mjazy nimi jadna, źož Latko jo sebje sam prědkstajił ako wósoł) a bildy łužyskeje krajiny. Listy znanje wót wuskego pśijaśelstwa a pódpěry, kótarež Šwjelic, bydlece w pódwjacornej Nimskej w Düsseldorfje, su Fryco Latkoju wopokazali. Wóni su jomu słali pakśiki a pjenjeze a wjele razow wót njogo bildy wótkupili.