Z Dešna/Dissen. Až cłonki mustwa „Serbske koparje/Wendische Auswahl“ njewuměju jano derje graś z balom, ale až mógu teke spiwaś, to su pokazali slědny tyźeń srjodu. Ten źeń ga su se zmakali zasej na zgromadny trening w Dešnje, na kótaryž jo pśichwatało 15 balokoparjow z Depska, Dešna, Brjazyny, Hochoze, Bórkow, Turnowa a Drjenowa. Pó połteragóźinskem treningoju, kótaryž stej nawjedowałej Horst Krawcyk ze Žylowa a Nobi Sieg z města, su se dali hyšći na zgromadne spiwanje. Wupytali su se za to našu serbsku hymnu „Rědna Łužyca“. Tu ideju za to jo měła Michaela Nowakojc, młoda Domowinarka z Dešna. Wóna jo była raz wuknica na Dolnoserbskem gymnaziumje a jo teke cłonk towaristwa „Serbske koparje/Wendische Auswahl“. „Gaž jo naše mustwo łoni grało pśeśiwo serbskemu mustwoju z Górneje Łužyce, smy dožywili, kak rědnje su tam naše gósći tu serbsku hymnu zgłosyli. A to my teke comy“, jo nam Michaela groniła. Pśigótowała jo za to łopjenka z tekstom serbskeje hymny. K tomu jo z handyjom zagrała tu melodiju.