Anett Zyšcyna ma mało casa: ako WITAJ-wótkubłarka źěła w Žylojskej źiśowni Mato Rizo. Wóna angažěrujo se we swójej cerkwinej wósaźe a w Rubynje a spiwa we chorje Łužyca.

A wót lěta 2016 su ju wót amtskego wuběrka wuzwólili ako cestnoamtsku zagronitu za serbske nastupnosći w Bórkojskem amśe. Wóna jo ta jadnučka zagronita za serbske nastupnosći we cełem wokrejsu Sprjewja-Nysa, kenž njejo w někakej formje w zastojsntwje pśistajona. Togodla jo musała se akle do amtskich strukturow a źěłańskich wótběgow zaźěłaś. A zachopjeńk jeje cesnoamtskego źěła jo był dosć wobśěžny: Gaž jo šula w Bórkowach to mě Mina Witkojc dostała, njejo Anett Zyšcyna ako zagronita za serbske nastupnosći pśepšosenje dostała. Pśez to jo zwěsćiła, až njejo zewšym prezentna dosć ako taka zagronita za to serbske.

Pśed njeju jo ten amt dłujkolětny Bórkojski šołta Martin Schmidt měł, pó nim jo amt žedne lěta njewobsajźony był a luźe su mjaztym tomu pśiwucyli byli, až nichten za to serbske pšawje zagronity njejo. Něco jo dejało se pśeměniś, jaden nowy zachopjeńk jo notny był.