Z Chóśebuza/Cottbus. „K našej domowni słušaju Serby. My se wjaselimy, až mamy w Nimskej taku ceło wósebnu mjeńšynu. Wóni su nimske a sakske a maju a woplěwaju swóju kulturu“. Na tom wugronje ministarskego prezidenta Sakskeje Michaela Kretschmera (CDU) su se póstarcyli cłonki Zwězkowego pśedsedarstwa Domowiny na wobradowanju pětk tyźeń we klubowni Dolnoserbskego internata. Marka Cyžowa, zastupnica Maćice Serbskeje, jo to wugrono namakała we interneśe na bokach sakskego kněžarstwa, we teksće kněžarstwowego programa, kótaryž jo Kretschmer pśi swójom stupjenju do amta wopowěźeł. Za jeje suźenim móžo se wóno tak rozměś, až sakske kněžarstwo pśigranja Serbam, až „my smy nimske“. To ju dopomina na něgajšne case [źož su pominali wót Domowiny, až dej se póznaś ako zwěstk serbski powědajucych Nimcow].