Z Rownego/Rohne. Sobotu a njeźelu pśed dwěma tyźenjoma su na Njepilic dwórje kazali na šlachtowanje. Pśigótowanja na ten swěźeń su warnowali ceły tyźeń. Južo wałtoru su chopili jěšnice gótowaś. „Wóno jo dało wjele źěła“, jo nam wulicował pśedsedaŕ Njepilinego towaristwa Manfred Nikel. „My smy měli wótglědanje, telik jěšnicow nagótowaś, aby jich njewubrachowało a aby nicht njemusał z proznymi głažkami a gjarncami domoj hyś“. Pśisamem wšykne 40 cłonki towaristwa a druge luźe ze jsy su pomogali tym flejšarjam: ako pódawarje, pśinosowarje a warjarje pśi kótłach z jěšnicami. A žeńske su wobstarali to sortěrowanje połnych głažkow jěšnice, ak su pótom sobotu wordowali pśedawane. Na jich wšyknych wugbanje jo Njepilic towaristwo wjelgin gjarde.