Wěcej ako 150 wobydlari brjazyńskeje gmejny jo pśišło do „Ballhausa“ na 5. januaru na woklapnicu. Wóno jo było kaž pśi balokopanju: wóni su swěśili dobyśa, ale teke žołte a cerwjene kórtki rozdawali.

Z Brjazyny/Briesen. Lětosna woklapnica jo wótběgnuła kaž dobre balokoparske graśe. Te grajarje su ganjali pśez móc pó grajnišću (z tym jo měnjony ten chytśe wupyšnjony zal). We tych 90 minutach jo dało rědne pódaśa, dobre woboranje a wjele stśělonych wrotow a juskanje. Naslědku, ako su kóńc wótšwicali, su te 150 zgromaźone byli wobjadne, až jich gmejnske mustwo grajo we wejsańskej wušej klasy ceło prězy.

Južo jadnu štundu pśed zachopjeńkom jo zal był połny. To pokažo, až wobydlarje se interesěruju za gmejnske nastupnosći a źěło towaristwow. Šołtowka Eva-Brigitta Šejcykowa (wuzwólowarski zwěstk wognjoweje wobory) jo wulicowała, co su łoni cynili a kake wótglědanja maju lětosa.