Dypkownje k zachopjeńkoju nowego nalětnego semestra 2018 su nowe programowe zešywki gótowe a wen pósłane. Tak ako w slědnych lětach dajo zasej wjele kursow za serbšćinu a pólšćinu, zgromadnje mógu luźe se wobźěliś na 58 serbskich rěcnych kursach, na 21 pólskich kursach a 18 razow se wótmějo pójsynoga z něgajšneju wjednicu šule, kněni Marju Elikowsku-Winkleroweju w serbskich jsach. Teke pśi tom su dwě jězbje, jadna do Wrocława a jadna do něgajšneje staroserbskeje wokoliny Stareje Darbnje. K tomu lice teke Tandem-projekty ze šulu w Žarowje a wósebny EURO-projekt z wuknikami z pólskeju šulu w Zelenej Górje. Teke w ramiku EURO-regiona dostanu sobuźěłaśerje zastojnstwa pósrědnjone znajobnosći w pólšćinje.

W cełem serbskem sedleńskem rumje póbitujo rěcna šula zasej wěcej ako 40 zarědowanjow za woplěwanje serbskich nałogow a drastwow a pśednoski wó serbskich stawiznach, kulturje a ludowěźe serbskego luda. K tomu pśidu hyšći styri źěłarnje za mólarstwo a fotografiju.