Z głownym źěłowym planom (Hauptbetriebsplan) 2018/19 zgubijomy dalšny źěl našeje domownje na brunicu. Teke strony wokoło Babinego gata (Katharinenteich) blisko Trjebina–Zagóry. Wóni słušaju ku zwěrjetnej zagroźe Trjebina. How jo namakaś wjelerakosć družynow. Se groni, až Babiny dam a Babiny gat (Katharinenteich) póchadatej ze starych casow, ako dwě grakatej sotše stej byłej žywe we Slěpem. Jadnej wót njeju su gronili Katarina. Wóna jo sebje natwariła grod blisko wjelikego gata we Slěpem. Drugej su gronili Mala. Wóna jo twariła grod mjazy Rownym, Trjebinom a Miłorazom we zwěrjeńcu. Jadna jo wopytowała, ten grod teje drugeje skóńcowaś z nasypom. Tak jo pśepadnuł Maliny grod. We srjejźowěku su bury we Babinem gaśe ryby kubłali. Pótom su te strony intenswinje wobźěłali a meliorěrowali, a górnistwo jo zawóstajiło swóje slědy. Pśez to jo na pśikład wjeliki Babiny gat se pómjeńšył. We póznjejšych casach su wóstajili naturje how wěcej pokoja. Pśez to jo mały Babiny gat źinsa tymjeńca srědneje wjelikosći. Pśi Babinem damje stoje cerwjene duby, ako su někak 150 do 200 lět stare.