Z Gór/Guhrow. Row fararja Herberta Cernje (Zerna) (1905–1955) tudy na kjarchobje jo wordował łoni wobtwarźony. Za to jo górjańska gmejna 600 € wułožyła. Teke struski su na smjertnej njeźeli na Cerniny row połožyli. To jo nam na našo pšašanje wulicyła šołtowka Kerstin Jaserowa na woklapnicy pětk wjacor w gmejnskem domje pśi sportnišću.

Šołtowka ma wótglědanje lětosa cesnu toflu pśi Cerninem rowje stajiś, we serbskej a nimskej rěcy. Wóna jo južo wuzgóniła, až to buźo jadnab 500 do 1000 € płaśeś. Pśez to pak, až gmejnska móšyna jo prozna, ga njewě se hyšći, źo budu tych pjenjez dobraś. Šołtowka jo pśeto dobreje mysli a ma naźeju, až to wótglědanje buźo se raźiś.