Wórjejce/Hoyerswerda. Pśedsedaŕ Domowiny Dawid Statnik a dolnołužyski župan Wylem Janhoefer stej pódpisałej pśi góźbje wobradowanja zwězkowego pśedsedarstwa pśed tśimi tyźenjami aktualizěrowane kooperaciske wujadnanje mjazy župu a kšywowym zwězkom. To nowe we tom wujadnanju jo, až prezidium zwězkowego pśedsedarstwa buźo se dwójcy k lětu z pśedsedarstwom Domowinskeje župy Dolna Łužyca zmakaś. Doněnta jo to zmakanje se stało jano raz k lětu, a wó to pśeměnjenje jo župa pšosyła – jo Dawid Statnik Casnikoju wulicował. Wušej togo jo we wujadnanju wustawjone, až we regionalnej pśiraźe za projekty LEADER we wokrejsu Sprjewja–Nysa a we regionalnem forumje LEADER w Błotach budu zastupniki župy Domowinu zastupowaś. [LEADER – pód tym mjenim chowa se projekt EU k pódpěranju inowatiwnych projektow na lanźe].