Z Hochoze/Drachhausen. Hochoska gmejna jo kóńc oktobera wótźaržała gromadu w Złośanem plonje. Šołta Fryco Wojto jo tam wulicował, až Złośany plon ma něnto nowe kšywo a nowe wokna a sćěny su izolěrowane. Z tym źěłom wence jo něnto kóńc, ale nutśi budu dalej twariś: do zala pśidu hyšći nowe stoły a teke nowy parket. Pjenjeze za to su dostali wót Picańskego amta. Pśi źurjach, źož jo pjerwjej garderoba była, su natwarili „serbski rog“ – blido z rědnym głažkom. Pjenjeze za ten projekt su dostali wót Amta za noworědowanje gruntow a wuwiśe jsow we Łukowje.

Móšynarka Picańskego amta jo wobydlarjam powěźeła, až wótněnta muse wšykne gmejny we amśe koncept k wurownanju etata prědk połožyś. To groni, až teke hochoska gmejna dej wótněnta žariś a swóje dobrowólne nadawki reducěrowaś. Šołta jo Casnikoju gronił, až jo wěsty, až budu weto pśemóc swóje pśedewześa wuwjasć.