Ze Serbskego domu. Domowinska župa Dolna Łužyca jo pśewzeła wažny a wjeliki nadawk. Domowina ga jo wobzamknuła, pśewjasć za Dolnu Łužycu serbsku kubłańsku konferencu (Bildungskonferenz). Tu ma něnt głownje na starosći dolnołužyska župa. Serbski rěcny centrum Witaj, kótaryž jo pópšawem zagronity za źěło na pólu serbskego šulstwa, jo měnjecy, až njamóžo taku konferencu a jeje pśigótowanje sam zwónoźeś. Pomagaś pak co. Na swójom pósejźenju slědny tyźeń wałtoru w Serbskem domje su cłonki wó tom wobradowali. Su byli wobjadne, až konferenca jo z takeju wažneju tematiku wjelgin notna a až njamóžo se wóna pśestarcyś do „nimjernosći“. Tych problemow a starosćow w serbskem šulstwje jo wjele. Ceptarje, źiśownice, starjejše a wukniki serbšćinarje cakaju na wótegrona.