Domowinskej kupce Chóśebuz a Žylow stej na lětosnu zgromadnu Serbsku kjarmušu w gósćeńcu „Nordstern“ w Žylowje slědnu sobotu wjacor pśepšosylej serbsku kulturnu kupku „Kólasko“ ze Slěpego. Spiwarki, spiwarje a gercy, kótarež su w lěśe 2012 załožyli tu kupku, su raźi pśijěli do Dolneje Łužyce. Z pisanym programom, za wětšy źěl w slěpjańskej serbskej rěcy, su rozwjaselili tych wušej 50 pśibytnych kjarmušarjow. Njejsu jano spiwali a muzicěrowali, ale su teke pokazali a rozjasnili wšake serbske drastwy, kótarež běchu se źowća a žeńske za wustup woblakli. Wulicowali su teke młoge wót źěła kupki „Kólaska“. Wóni se staraju za to, až wóstanu žywe tamna kšasna serbska drastwa, serbske spiwy a ako to nejwažnjejše slěpjańska serbska rěc. K tomu su wudali wósebny slěpjański spiwnik, su pomagali pśi zestajanju małego słownika slěpjańskeje rěcy a něnto pśigótuju wósebne knigły wó źiśetkach w slěpjańskej wósaźe. Kužde lěto teke zestajaju a wudaju wósebny kalendaŕ z rědnymi fotami.