Nowemberske wudaśe kulturnego casopisa Rozhlad wusměrijo se tenraz na Dolnu Łužycu. Z někotarymi pśinoskami glědamy na slědne jubileje, z někotarymi samo hyšći pitśku dalej do zachadnosći. Jaden z nastawkow jo wó Simon Gastu, kapłanje, kótaryž jo w do- a póreformaskem casu w Lubinje statkował. Lěcrownož jo wó njom mało znate, ma jogo źěło wuznam: Wón jo był ten prědny, kótaryž jo kjarliže do serbskeje rěcy pśestajał. Madlena Malinkec jo se z jogo swójźbnym póchadom a žywjenim zaběrała.

Jubilej jo mjazy drugim swěśiła Šula za dolnoserbsku rěc a kulturu. Ingrid Hustetowa, kótaraž jo z njeju zwězana, jo pósćiła šuli někotare mysli. Interview w Rozhlaźe jo tenraz z Mariju Elikowskeju-Winkleroweju, kótaraž jo se wjelgin za rěcnu šulu zasajźowała a kótaraž jo tejerownosći na muzikowem pólu wjelgin angažěrowana.