Stawizny Chóśebuza kóńc 1980ych lět wjelgin njestoje we tuchylnej debaśe. Chto ga hyšći wě, až teke w měsće smy měli „Neues Forum“? Pśed lětoma jo pak chóśebuske Statne źiwadło tematizěrowało nejžmłodšu zachadnosć města we kusu „Cottbus-Projekt“. Inscenacija jo wušej togo pokazała na wšake problematiske póla ako žywjeńske abo pśichodowe perspektiwy we pódzajtšnej Nimskej, abo to wótdrogowanje młodych luźi. We šesć scenach togo „Poetiskego źiwadłowego wjacora“ su pśepšosyli woglědarje, se raz pšašaś: „Kak cu ja zapšawym žywy byś we mójom měsće? Kaku gódnosć ma lichota za mnjo?“ Jaden źěl graśa jo był „Eine Stadt träumt Zukunft - Euphorie \'89, źož wó to źo, co te luźe su kśěli, ako su se na pónjeźelach zmakali pśed měsćańskeju halu a pśed Wusěju (Nimskeju) cerkwju. Kake naźeje su měli – a cogo su se bójali? Wšak jo chóśebuski wobcerk dłujko był znaty za to, až how se nic njetšoj, na nimske jo se jomu groniło „Stillhalter-Bezirk“. Pór luźi ale jo se angažěrowało – na pśikład we wobswětowej kupce. Rozsuźecy impuls za załoženje teje ekumeniskeje kupki jo dał Peter Model ((1939-1993).