Awstraliska glěda slědk na 230lětnu historiju wobsedlenja pśez Europejarjow wót lěta 1788. K pśidrogowarjam licy teke 5000 serbskich luźi z Dolneje a Górneje Łužyce. Wobydlarje Bobolc (Boblitz) pla Lubnjowa kśě chrom teje jadneje sameje serbskeje šule w Połdnjowej Awstralskej, we jsy Ebenezer, wótnowiś a zeźaržaś.
Ebenezer/Bobolce. We cełej Awstralskej dajo wjele pomnikow a starych twarjenjow, ako dokumentěruju historiju wobsedlenja. Bóžko, ten zub togo casa njeznajo žednu gnadu a młogi historiski pomnik jo rozpadał. Taki kjabel njedej se dostaś něgajšnej šulskej wjažy we jsy Ebenezer w pódpołdnjowej Awstralskej, lažecej 6 km pódpołnoc wót Nuriootpa we dołu Barossa Valley. To jo prědna a ta jadna sama serbska šula w Awstralskej, źož su něga měli serbsku wucbu! Lubowarje historije z Bobolc pilnuju se wót nalěśa, kak mógali ju wuchowaś. Pśez to, až šulska wjaža lažy 20.000 km wót Bobolc, jo to psedewześe komplicěrowane.