Wobcerjenje wobzwarnowaneje krajiny „Słomjeńska góla“ (Slamener Heide) jo 303 ha wjelike a dosega wót Grodka až k Sprjejcam. Srjejź tych stronow, ned pśi rěce, lažy wobzwarnowana natura Słomjeńske Kuty (Slamener Kuthen), 20 ha wjelika. W Kutach namakajo se hyšći stary pśirěcny lěs z wjele rědkimi rostlinami a zwěrjetami. K nim słušaju orchideje a jałowjeńc (Wacholder).

Strowa natura Kutow a wjelike rezerwy wódy su byli wina na tom, až pśed 85 lětami su tudy natwarili grodkojsku wódarnju (Wasserwerk). We 1930 lětach su wódu wóthow pśedawali ako „Słomjeński riesling“ a hyšći źinsa naglěda se wóna ako nejlěpša we wokolnosći. K wódowej seśi su pśizamknjone město Grodk, ale teke Drětwja (Zerre) a Sprjejce (Spreewitz).

Zwěstk za wobzwarnowanje natury NABU a grodkojski Zwěstk za wódu SWAZ staratej se gromaźe wó Kuty. Gromaźe organizěrujotej Dny wódy a natury. Nastali su wucbna sćažka, stacija za naturu a wšake biotopy. Kólasowa droga spóromje Sprjewje wjeźo teke mimo. Pśipódla su informaciske tofle nastajane.