Amtěrujuca wjednica Serbsko-nimskego domowniskego muzeja Janšojce Diana Susanne Šejcowa (Schuster) jo lubosćiwje pśigótowała teke lětosnu noc muzejow zgromadnje z towaristwom „MY za Janšojce“. Nocnym gósćam muzeja su cłonki towaristwa póbitowali fryšnje pjacone mlince, grilowane jěšnicki, skiby ze šmałcom, piwo a wšake lěbgodne piśa, aby wóni se culi ceło derje zastarane.

Pó tradiciji su Janšojske dujarske gerce wótwórili noc muzejow na farskem dwórje. Cełu noc su luźi ze swójimi štuckami rozwjaselili. Pśestawku su cynili pśecej pón, gaž su wustupili „Smuźone górki“ z Lubnjowa w muzeumowej brožni ze swójim sebjeironiskim, interaktiwnym a muzikaliskim źiwadłom. Spiwali su spiwy z 20tych a 30tych lět.

W głownem twarjenju muzeja su se gósći wopóznali ze serbskimi stawiznami jsy a sebje woglědali aktualnu wustajeńcu z wobrazami na temu „Póroźowanja powěsćow – Sagengeburten“. Na noc muzejow w Janšojcach jo pśijěła teke lubnjojska wuměłcowka Monika Schubert. Wóna jo se tomu wjaseliła, až woglědarje su se zajmowali za jeje wobraze wó serbskich powěsćach.