Žylow/Sielow. Źiśi w žylojskem Witaj-horśe su krydnuli pśed krotkim za cas ferijow wósebnu zaběru póruconu. Jagaŕ Gerhard Dix z Dalica jo k nim pśišeł na woglědy z infomobilom jagarskeje iniciatiwy „Lernort Natur“, což jo projekt Bramborskego jagarskego zwěstka. Infomobil – to jo rozpokazowański wóz z wutykanymi zwěrjetami a źiwinu, ak jo žywa w góli. Źiśi njejsu je hyšći žednje tak blisko wiźeli, a dla togo su narske gósća wupšašowali. Jo ta liška zrosćona? Kak se groni tym ptaškam? Kak wóni spiwaju? Lilly jo se wopšašała za běłym jelenjom, ak jo młogi raz wiźeś w góli na pódwjacor wót Chóśebuza. Gerhard Dix njejo wěźeł na to pšašanje wótegroniś, pśeto hyšći žednje njejo togo jelenja wiźeł.