Kóńc Witaj w źiśowni w Nowej Niwje jo był wjeliki tema w Serbskej raźe. Rozgórjony dla togo jo był wósebnje we wokrejsu zagronity za serbske nastupnosći Dieter Freihoff. Jo k wěsći dał, kak kšuśe su pjerwjej wójowali, až buźo Witaj w Nowej Niwje. Wejsny šołta Norbert Janetzki jo był wuźěśony (entsetzt), ako jo wót togo zgónił, jo gronił Freihoff.

Freihoff wiźi winu wósebnje w amśe Luboraz-Górne Błota. Wóni njejsu z nim powědali, ale su kśěli tu wěc zamjelcaś, měni serbski zagronity. W Nowej Niwje jo była jadnučka Witaj-kita w cełem wokrejsu, jo pódšmarnuł. Teke Anika Schäferowa ako wjednica pśisłušnego amta njejo zapśěgnjona była a jo akle w pśedpólu pósejźenja Serbskeje rady wót togo zgóniła. Freihoff jo měnił, až buźo se to direktnje na šulu w Tšupcu wustatkowaś, źož njepśidu wěcej wukniki z dobrym rěcnym niwowom z Noweje Niwy.