K tym wjelgin angažowanym a njewomucnym Serbam a Domowinarjam w katolskich stronach wokoło Kulowa/Wittichenau słuša dr. Pětš Brězan ze jsy Sulšecy/Sollschwitz. Wón jo źěłał ako skótny gójc, jo był pó lěśe 1990 žedne lěta zastupny pśedsedaŕ Domowiny. Jo nawjedował serbske towaristwo „Bratrowstwo“ (Bratšojstwo). Jomu pśisłušaju katolske Serbowki a Serby z wosady Kulow. Wóno běšo se 1898 załožyło, w lěśe 1938 zakazane a 1994 w Sulšecach nowo załožone. K towaristwoju słušatej měšany chor a źiwadłowa kupka, ako wustupujo ze serbskimi štuckami.
11. awgust jo dr. Pětš Brězan zešwyrnuł swój 85. narodny źeń. Wjelgin swěśiś pak njejo mógał, dokulaž jo se rowno w tom casu wobźělił na tradicionalnem „putnikowanju“ (fromne drogowanje pěšy) katolskich wěrjecych wót Waršawy do Czenstochowy. Krotko jo jano domoj pśišeł na swój burstak, pón jo se zasej wudał do Pólskeje.