Budyšyn/Bautzen. Towaristwo Smy, ako jo zwězane z Iniciatiwu za Serbski sejm a se pilnujo wó nastaśe demokratiski wuzwólonego serbskego parlamenta, jo pla Załožby za serbski lud oficielnje prědk połožyło pšosbu wó pódpěru za organizěrowanje wuzwólowanja do Serbskego sejma. Co buźo se něnto z teju pšosbu staś? Dajo realistiku šansu, až załožba pjenjeze zwólijo? Direktor załožby Jan Budar jo nam gronił, až towaristwo Smy pšosy we swójom póžedanju wó wěcej ako 25.000 euro, a to jo ta granica, wušej kótarejež musy rada Załožby za serbski lud wobradowaś a pjerwjej swójo „jo“ groniś, dej-li załožba za tu wěc pjenjeze daś. To buźo nastupnosć na pśiducem wobradowanju załožboweje rady. Budar jo nam teke gronił, až załožba njama doněnta we swójich směrnicach (regulach za wudawanje pjenjez) žednu rubriku za politiske źěło wustawjonu. Lěc buźo trjeba taku rubriku wustawiś, to jo pšašanje, na kótarež buźo załožbowa rada teke wótegrono namakaś.