Na zachopjeńku mójogo studija w Praze smy gnali do science fiction filma wót Stevena Spielberga „Close encounter of the third kind“ (Bliske zmakanje tśeśego schójźeńka). Źinsa se mě zda film zastarany, ale tencas smy byli fasciněrowane, skerjej dla togo, až smy jen mógali wiźeś w praskej Lucernje w originalnej rěcy (z českimi pódtitelami). Głowny element jadnanja jo komunikacija ze zwenkazemskimi. Wědomnostniki to cynje we filmje z muziku. Ze synthesizerom graju slěd pěś tonow „d–e–c–C–G“ a maju naźeju, až stwórjenja z drugego swěta to rozměju. Wóni su pak dosć inteligentne a zazdaśim rozměju kumštnu rěc solresol, we kótarejž te zuki maju wuznam H–E–L–L–O. Wšojadno, lěc to tak jo abo njejo, na kuždy pad jo wiźeś, až muzika pśinosujo k dorozměśeju.