Chóśebuz/Cottbus. Wałtoru tyźeń w klubowni Dolnoserbskego internata jo wobradowała serbska akciska seś. To jo gremium, kótaremuž pśisłušaju zastupniki serbskich institucijow, šulow, komunow a amtow. Jogo wótglědanje jo, zgromadne akcije kooridněrowaś, informacije a nazgónjenja wuměnjaś a pśemyslowaś, kak mógali nejlěpjej aktuelne problemy pśewinuś.
Seś ma nowego zastupnego koordinatora
Na pśiraźenje koordinatora akciskeje seśi Měta Nowaka su cłonki wuzwólili Marcusa Końcarja, šefa chóśebuskego běrowa Domowiny, ako zastupnego koordinatora. To jo było trjeba, aby akciska seś mógała pśecej njewótwisnje wót statnych a ministerialnych strukturow źěłaś. Pśeto Měto Nowak ako referent krajneje zagroniteje za nastupnosći Serbow (a stakim sobuźěłaśeŕ bramborskego ministarstwa za wědomnosć, slěźenje a kulturu) ma wuwězanej ruce, gaž akciska seś jadna z jogo abo drugimi ministarstwami abo sebje něco wót nich pomina. Marcus Końcaŕ buźo we takich padach słušnosći koordinatora pśewześ.
Zarownanje kostow komunam za nałožowanje serbskeje rěcy