Turizm w Błotach ma swóju tradiciju – južo pśed 128 lětami, we lěśe 1889, jo Kito Šwjela w Bramborskem Casniku pisał, až cołnarje maju wósebne sedła na cołnach za gósći. A wón wabi lazowarje k woglědanju Błotow a raźi, kak dejali se pšycam woboraś.
Z cołnom z Bórkow na Lipje jěś, jo něto wušej měry rědnje a lubosnje, pózdźej wóstudno, dokulž pózdźej žedna tšawa wěcej njestoj. Wokoło Lipjego a Lědow stoj ta tšawa kaž trajda a zwjaselijo wócy a wutšobu. Skóro se zda, až njejo móžno, take strony tšawiska wobźěłaś a do rěcha spóraś. Do swětk buźo jeje juž wjele póseconeje lažaś. Chtož ju togodla hyšći woglědaś co, kśěł nanejpózdźej swětki pśiś.