Slěpe/Schleife. Za tym, ako koncern LEAG jo wuzjawił nowy koncept za swój brunicowy rewěr, maju wobydlarje pótrjefjonych jsow slěpjańskeje gmejny něnto to póžedanje, až dej byś pśez kazń garantěrowane, až LEAG pśi swójich planach wóstanjo. „Koncern musy se wó to staraś, až to wótstupjenje wót terganja jsow buźo napśecej a nic jano nachylu. Za to dej se kazń wobzamknuś. Něnto pśiźo rěd na amt krajnego raźca, statne kněžarstwo a sakske ministarstwo za nutśikowne nastupnosći – wóni deje něco we tej wěcy cyniś. Źaseś lět smy we njewěstosći žywe, a to jo dosć, togo smy nabyte“. To jo gronił Jörg Funda, zastupny šołta pśedslědny tyźeń na wobradowanju gmejnskeje rady.

Wobydlarjam du wšake myslenja a pšašanja pśez głowu. Deje abo njedeje swóje domy pórěźaś a do nich inwestěrowaś? Kak dalej z njerěšneju wódu? Deje nowe dogrono za librowanje śopłoty wótzamknuś? Deje spěšny internet twariś? Teke gmejna ma tu starosć – wóni ga teke dłujki cas njejsu pórěźali drogi, chromy a mósty.