Lubnjojski błośański a stśělbowy swěźeń – nejwětšy ludowy swěźeń tudy – pśewjeźo se lětosa wót 29. junija do 2. julija. Póglědajmy slědk na jogo historiju.
Jadna paršona jo z tym swěźenjom na wósebny part zwězana: muzeologowka a etnologowka Christel Lehmannowa-Endersojc. Wóna jo pśed 44 lětami, we lěśe 1973, wónu ideju wuwjadła. Nježlic to jo se stało, jo wóna tudy, we swójej nowej domowni, źěłała we wokrejsnem kabineśe za kulturne źěło ako fachnica za ludowe wuměłstwo. Cełe kulturne žywjenje Lubnjowa jo profitěrowało wót jeje znaśow a dobrych idejow. Dla tog, pśi komunalnem wuzwólowanju 1971, su ju wuzwólili ako cesnoamtsku měsćańsku raźcowku za kulturu – tu nejmłodšu raźcowku we cełem. We tej funkciji jo se pilnowała wěcej wót kultury Lubnjowa we zachadnem casu zgóniś.