Slěpe/Schleife. Tuchylu pśigótuju se grunty za pśiducy Nimsko-serbski šulski centrum: zgromadny kompleks za zakładnu šulu, wušu šulu a hort. Wón dej byś do kóńca lěta 2020 gótowy a jo planowany za 220 wuknikow zakładneje šule, za 250 wuknikow wušeje šule a za 120 wuknikow we horśe. Šulska kuchnja dej kuždy źeń jěź za 400 do 450 wuknikow wariś. Ten wjeliki chrom, gromaźe z noweju turnarnju, dej stojaś na 13.000 m². To cełe twarjenje dej naslědku nanejwěcej 24 milionow euro płaśeś – to jo gmejna ako twarski kněz wustajiła.
Šulski centrum twari se na pódłožku wujadnanja mjazy Vattenfallom a gmejnu z lěta 2008. Gmejna njemusy ze swójeje móšyny nic pśipłaśiś. 7,6 milionow pśiźo wót sakskego ministarstwa za kulturu, zbytne pjenjeze pśiłožyjo LEAG.